Vizin al fogolaro

BARUCCIANO O GIACCIARELLA?

El grande giornalista Fracaroli
scritor de bona fama, veronese,
compaesan del bon poeta Poli,
su un «pèzo» l’ha osservà che ’sto paese

el gha on nome pitosto chilometrico,
scomodo par i timbri, i indirizi…
fasendo el conto esato, aritemetico
de le silabe e de tuti i sghiribizi;

e l’ha proposto on nome più sintetico:
lu’ l’avaria prescielto BARUCCIANO,
più curto, belo anca sul piano estetico,
che univa «Baruchella» con «Giacciano».

Ma Fracaroli forsi no’ ’l saveva
che, oltre a marìo e mojère, gh’è anca on fiolo
che, a trascurarlo, ghe va sù la frèva,
e el pòl becàr più acuto de on asiolo.

Anca invertendo e dire «GIACIARELA»
se cascaria ’t’el stesso inconveniente:
restarìa l’omission, la lamentela,
parché gh’è i du’ de prima, e Zelo gnente.

Mì, che son fin, gho ’vu’ ’sto pensamento:
parché che no’ î se ciapa de strapelo
’té ’sta fameja senza sentimento,
struchémoli, e ciaménla BARGIAZELO!

STRADINE

Me piase le stradine de campagna
quando no’ gh’è più case da le parte
che, paralela, gh’è ’na cavezagna
o on fosso che continua a compagnarte,

da l’altro fianco on bel filar de piope
che se perde distante chissà indove,
o ’na strena de sàlesi da stròpe
zale, lustre, che al vento le se mòve…

che dopo le finisse inté ’na corte
indo’ se snasa odor de ròbe antiche,
on sano odore, inebriante, forte,
de luamari, stale, vache amiche,

e bàgola dî s-ciapi de galine
che scròzola, le ruspa, che le bèca,
e nuvole de vispe faraonzine
che sóla sóra on ramo, su ’na stéca.

Come, presèmpio, in fondo a le Tadiole,
che dopo el bosco – on fresco saporoso –
te brusi fòra a l’aria, in pieno sóle
in corte dai Castèi, meravilioso

mondo vivo ormai solo nei ricordi,
a le Tadiole in altri du’-tri posti,
dopo che ’sto progresso da balordi
l’ha volu’ el bèlo (?) e el nòvo a tuti i costi.

Anca me piase i spazi vèrti, in alto:
sbicicletar sul Tartaro, in Danà,
tornar indrìo par l’àrzare e, co’ un salto,
passare in Bentivoglio qua de qua,

andare inanzi longo la corente,
fermarme indo’ se vede a l’infinito
e pèrdarme col cuore e co’ la mente
in fondo…, là… (ma questo è stà zà scrito!).

EL BOSCHETO

… E se ghî tempo dèghe n’ociadina
al boscheto selvagio a le Tadiole:
on quadratin de America Latina,
de Amazonia, piante, aquoa, sole.

I dise ch’el sia nato inté ’na cava
de la fornasa, lì, poco distante,
quando zent’ani fa ghe lavorava
òmeni e dòne a far le piere sante

che ha trasformà la casa dei cristiani
ch’éa a campà fin allora int’i casoni
int’è le condizioni quasi dei cani
o int’i saràji piègore e moltoni.

Lo testimonia infati la bassura
che favorisse la vegetazion,
sempre stagnando lì l’aquoa piovana
inverno e primavera, e a ogni stason.

Predomina i salgari, int’un ingrójo
de sotobosco pien de spalpanazi,
d’erbaze che s’ingrassa ’tè quel mòjo,
verso le piante a gara alzando i brazi

per bévare on po’ d’aria e on po’ de sole,
ch’el fadiga a sbusare tra el fojame
de le alte piante, fisse e de gran mole,
cressù lì in gran disordine e bailame.

Forse jè stà piantà come bisogna,
ma dopo mai nessun gh’è più stà drío,
siché ghe n’è de bèle, altre ha la rogna
e rami sechi; tante, po’, ha finìo.

Però la vita l’è tuta in gran fermento,
’na vita primitiva, «naturale»,
de l’omo, infati, manca el sentimento
che dà spirito al «bruto», «al materiale».

Bùlega in aquoa on mondo abominoso
de moluschi, d’inseti d’ogni specie:
le rane, el ròsco, misero, schifoso,
sìgola e gràchia da stornir le récie.

A mez’aria voltegia le farfale
posandose sui fior salvadeghini:
a nuvole, da l’aquoa, le zenzale
le sbusa fòra, e via par far… busini.

Se ghî del tempo, ’ndèghe a le Tadiole:
el salvàdego el gha la so’ magia
come el Mistero e el Mondo de le fòle,
spesso più bèi de la Filosofia.

L’EMBLEMA

Che ’na rénga o on sardelon,
tacà a on trave del solaro
par on spago, a pingolon,
i sia stà pasto non raro

par siè-sète, o più, persone,
ch’i pociava pian-pianìn,
no’ fracando, co’ le bòne,
ch’in vanzesse, anca, on s-ciantìn,

mì no’ credo sia sucesso:
l’è ’na fòla… Anzi on «emblema»
– come î usa dire adesso –
de miseria, fame estrema.

LA NELDA

… e quando sarà morta vostra Nòna
zighè tute le lagreme che ghî,
parché no’ so se, dopo ’n’altra dòna
com’ela nassarà in ’sto mondo qui.

Setant’ani: mai ferma pa’ on minuto:
in giro par el mondo l’ha laorà;
in casa, vècia, sempre è stà de ajuto
a la femeja in tempi sfortunà.

Rangiarse, far de tuto: che riposo!
Mai che la stesse co’ le man in man:
l’ha jutà e po’ assistìo el so’ caro sposo,
l’ha pensà a valtri, a on vostro bon doman.

Sperè pur che la campa altri vint’ani:
l’è de ’na raza resistente assè;
ma quando… (no’ sén angeli, ma umani),
Sofia, to’ mama, to’ fradèi, zighè.

FOGOLARI

On pegnatin al fògo:
tre bronzine de legna mortàiza.
La fumegara ferma a metà capa.
Inutilmente on vècio el fògo stiza.
On sbrufòto de vènto, e la cusina
bolgia negra che i òci te sassina.
Sul fogolaro ’na fassina séca
al fògo fa coragio:
la sbanparà moltiplica el tiragio.

E al ritornar del ciaro
che vien dal fogolaro
sluse anca tante lagreme,
che a diese-dódes’òci le fa grumo,
e non solo pal fumo.