“Cuco Bel Cuco”

Sentà in te 'na panchina ruzena del parco, al'ombra de sti alburi veci, storti e rugosi dai ani, a vardo i putini zugare coi zoghi più strani: machinine, robòm reoplani, mostri de omani ca' se move da soli, avanti e indrio, guidà da on agegio ch’ el se ciama "telecomando".

Pori putini, no'i sbate gnanca on ocio, tuti intenti a menare sta manopola in su e in zo par movare sti paiazi de fero smaltà.

A tiro on sospiro de compasion e de nostalgia e, menando la testa, a me cucio par tera vizin a luri, fago do tre muceti da quatro sassi grossi con uno in zima e ghe tiro incoste co 'naltro fin ca no i buto zo. Daprima i me varda storto e on fià difidenti, dopo ai gò tuti intorno col so bravo sasin in man pronti a tirare.

Semo 'ndà avanti on toco, e me godeva vedarli col viseto rosa e i oceti lustri de contenteza. I gaveva, sì le manine sporche e le snarocie al naso, ma i vedeva vivi, senza ch’ea smorfia de indiferenza sula boca.

Ai gò lasà de malavoia coi so oci che i me punzeva la vita e la ruza dei robò 'bandonà sui sassi. El giorno dopo a son tornà in tel parco su la solita panchina, col me solito giornale a lezare tute le strambarie ca succede in tel mondo. Me sento tirare 'na manega, da desora el giornale, a me vedo dodese oci ca me implora in silenzio. Be', a m' è vegnù le lagreme ai oci e, par darme on fià de contegno, col fazoleto in man, a go insegnà a zugare a robafazoleto.

A me son vista putina, in 'tel me paese, d' istà, soto sira, vinti, trenta putini a se catavino drio la coronela a zugare a mosca cieca, ala lipa, lupo lupo, bandiera, a scondarola su e zo dai fosi, sudà e sbavanà dal caldo fin ca no vegneva scuro e alora in zercio zugavino a cucucie spetando l'ora de zena. Tornavino a casa cantando drenà, spurchi e contenti, 'na lavà in tel mastelo de legno, se magnava 'na scude'a de cafelate col panbiscoto, po’enta e tocio coi faso'i in potacin, fasevimo in pressia el segno de croce e, mastegando in latin l’Avemaria, se indormezavino cola testa sula tola.

Po'enta e faso'i, la pinza onta, la brazadea in te la stua a legna e i polastrini sfasanà suel bronze soto el cuercio del camin, come ca fasea me nona. A me vien l'acquolina in boca e le lagreme ai oci dala nostalgia, cosa pagaria par tornare indrio anche solo par un giorno a gustarme ancora 'na volta sto gusto de vivare semplice e pulito, dove in te la nostra povertà a se vulivino tuti ben, a gerimo felici con gnente, ne bastava poco, parché a chi tempi, a ghevimo ancora el tempo de 'scoltare i ose'eti ca cantava, da vardare la luna, da cantare la serenata coi grili in te le noti calde, de cuntare i cu-cu del "cuco bel cuco" che, fra le cane dei fosi, el ne cuntava i ani par maridare.

Adeso xe cambià tuto, se core tuti come i mati par lavorare in te le fabriche, serà fra quatro muri de cemento, se magna la "nutella" e i "surgelati" par far più presto e par conosare el futuro a se va dala "chiromante". Xe proprio on mondo roveso e dele volte a me domando che facia che i faria i me veci se i tornasse al mondo.

Xe meio non pensarghe e metare on fren ala fantasia.