In copeta all’angelo

Al me' paese ghe xe un gran bel campanile, elegante e fatto ben, e alto, tanto alto.

El ga le so' campane, desora le campane i pergoleti, e dopo la cupola.

Desora la cupola l’angelo. Co’ la so’ mata tromba, e le ale cole pene, che lo fà girare quando che’l vento ghe supia incoste.

El poza su la ponta de un pie’ solo, come se’l fose drio ciapare el volo. Proprio come un angelo vero.

De le volte me fermo a vardarlo. Incantà.

’Na volta, a forza de vardarlo, no’ so come, me ghe son trovà sentà in copeta. All’angelo.

Mi e lu, da là de sora, se podeva vedare tuti i campi intorno, come un buzolà, al me paese.

Un cadin tuto fresco, e verde, e pulito, e in mezo te geri ti, Lendinara, e te slusegavi come ’na perla in mezo al veludo. Quando ca tela mostra quelo che vende i preziosi.

Da là de sora se podeva, mi e lu, incantarse vardando le to’ bele strade, drite e nete, le to’ cese importanti e i to’ palazi antichi. E ’na strissa lustra che te tajava par longo: el canaleto.

E se podeva anca vedare la to’ brava zente, generosa, operosa, anca bela, e cola facia neta.

Vedendo tute ste beleze, mati ne pareva de deventare.

Mi e lu.

Ogni tanto, par cambiare vista, sbatevino le ale.

Quando po’ ca saltava fora ’na roba più bela de ’staltre, a ghe davino anca ’na paca cola tromba.

Dire che anca mi me sentivo un angelo, a saria forse un fià esagerare.

Anca parché de sicuro el Padre eterno el gavaria anca lu da dire la sua.

A la fine, no’ so come, me son trovà da novo là soto, par le strade.

Vardandole da viçin, no’ le gera miga cusì nete.

Le case e i palazi, cusì casenti, i pareva ancora più veci. E la strissa che spacava Lendinara no’ me pareva che la slusegase massa.

E gnanca la facia de qualchedun de la to’ brava zente no’ la gera massa neta.

Cara la me Lendinara, chel giorno me son acorto che anca ti te sì deventà come ’na bela dona ormai un fià pasadela. Magari uncora gran bela, ma che no’ bisogna vardare massa da viçin.