La luna nel pozzo

LA PROCESSION DEL CORPUS DOMINI

Quando Maggio el jera tuto un fiore
e dapartuto a fiorìa le rose
andavino col zestin de vimane
a la Procesion del Corpus Domine.

Pien de fiuri
de tuti culuri
e le putine
co’ la stola rosa
de le “beniamine”,

Tuta la zente vestia a festa
e le querte più bele
messe su le fenestre.
A se girava par el paese
spargugnando ’sti fiuri a più riprese,

cantando tuti in coro “Ave Maria”
finché la festa jera finia.
L’unico ca lavorava
in ch’el dì el jera el stradin
ca ghe tocava spazare fin a sira
par tirar su tuti chi fiorelin.

I CORI DE ’NA VOLTA

Come faseveli
la zente de na volta,
con tuto quel lavorare,
averghe anca
la voja de cantare!

Epure, alora, in campagna
el jera tuto un coro;
chi fusse drio zapare o vendemiare,
tirar la canoa, o spigolare,
mai i smeteva de cantare.

Intonava ’na voce solitaria
e tut’un coro
a te sentivi par l’aria:
con l’anda del cantare,
forse, jera men fadiga el laorare!

I FIURITI DE MAGGIO

Le scarsele piene de amuli,
’na ratatuia de ragazoi
intorno al monumento,
rondini che volava
tute in fermento.

Queste le jera le sere de Maggio
de la me infanzia d’incanto;
a zugavino a scalon e a butun,
a girotondo e a campanon.

Tra rondinele e ragazoi
a fasivimo a gara
a chi fasea più cagnara.
Epure a jerimo contenti
anca sa ne ghivimo
zugatoli importanti.

Quando po’ a vegnea scuro
in te ch’le sire chiete de l’istà
a metivino nele scatole
le luciole ch’ivino ciapà:
par molarle nel scuro
de la camara e sognare
come fussimo al cinema.

Robe de ’na volta,
che adeso gnanca i se le sogna
ma che, alora, le impinìa
tuta la nostra fantasia!

BOSARO

Venti case in fila su Canale,
na strada a mezza curva
ca finisce in d’un piazale;

na cesa bianca
e na luna grosa
coma na polenta zala:

in parte, na màcia
de alburi de spinaro…
a si zà a Bosaro.

LA LUNA NEL POZZO

Quando, ne le sire calde de l’estate,
la luna, in tel fondo nero
del pozzo, se speciava:
a tiravino su el secio

de la to’ acqua ciara
che la nostra arsura smorzava.
Quanti sogni se fasea,
quante paure nascondea
ch’el buso nero tondo tondo
ch’el dava vita al nostro mondo!

Dov’ei andà a finire
tuti i pozzi de ’na volta?
Tuti adesso in ca’ i gà l’acqua
ca se tira disinvolta
ma i se la sogna
quela bona de ’na volta.

Fresca acqua bevù
su l’orlo de la cazza!…
A proposito, alza la man
chi sa cossa ch’la sia,
parchè me sa
che anca quela l’è sparìa.

LA SFOIA

Mi a penso d’aver avù
oto o nove ani quando che me nona
la m’insegnava a fare la sfoia.
La me disea: ’na brava azdora
la deve rompare i ovi
anca co’ ’na man sola!”.

D’le gran smelazà a me son dà
prima d’aver imparà.
“Sa te vo’ che le vegna bele zale
buta la farina in te ’na volta sola;
lavorala subito e non farla screpolare,
infarinala e, nel tovaiolo, fala,
al fresco, riposare”.

La me metea in man el sgnaduro,
“Girala sempre – la me disea –
la sfoia la deve deventar
fina e trasparente.
E ricordate che le taiadele
le deve essar cote sempre al dente!”
“Quanto, nona?”
“Fin che un cavalo el passa un ponte!”

LE CASE ABANDONÁ

Casa polerana,
spersa in mezo a la campagna;
quanta malinconia che fà
ste case abandonà.
Con le porte e i balcun, verti spalancà,
come la boca de na dona, vecia e sdentegà.
Pensando a quante vite
lì dentro iè pasà.
Fioi ca corea, mame ca lavava,
omeni che de laoro sudava;
i vivea de poco,
quatro radici catà in te l’orto;
i se scaldava de stichi
e, sel ghe iera, un zoco.

Na vita grama, ma piena de dignità,
i fioi de so fioi, adeso, sirà in zità,
in te na bela casa riscaldà,
tuti i dì i ga el pan,
ma, forse, ghe manca la felicità.
Chi sà si pensarà
da inonde chi i è rivà,
e dove le radise i à lassà.