Co’ penso

CO’ PENSO

Co’ penso mi vedo ancora me mama in travesa e zopéi sentà sul fogolaro al ciaro del canfìn a sponciazare busi e a tacar tasseli so ‘e braghe di fradei, a fare ‘l so redin o la rede de la negossa ca servéa a me pare co’ l’ndaséá a pescare.

Co’ penso mi vedo ancora me mama curva dessora ‘na zapa a rmpare i loti de tera sichi brusà e sugarse lagreme e sudori co’l fià. Portare muci de fen co’ soto du angùn, inasiare in cusina ‘l magnare par i veci e i cugnà.

Co’ penso mi vedo ancora me mama co’ la testa zà bisa e tanti ani mucià, cucià drento ‘l brolo a sunare straversà de bisi e fasoi e destregolare, destregolare… sentà sul meale.

Co’ penso mi vedo ancora me mama in t’on dì de sisara destirà in te ‘na cassa co’ l’abito novo, co’ i oci serà, le man messe in crose e intorno ‘na luse de ziri impizà e tanti fiori ca paréa istà.

EL TENPORAE

Xe note fonda. Vento che fis-cia. piova che picia sora i balcùn. Tronà ca spaca el zielo. Zòete che smove i copi de la cà. Can che baia, porte ca sbate. I spiriti di morti i gira in tinèo. La zente se rodola insonà drento le cuerte, ‘na vecia la prega brusando l’ulivo benedìo. Le saete le xe manco seche. D’on trato la piova se chieta, vien fora e po se sconde la luna de novo, el zielo no xe pi de fogo. Sona la sveia in te la stala. Lievate boaro ch’el dì se fa ciaro e drio el paiaro l’arcobalén l’anunzia on zorno serèn.

I FASOI BALOTONI

“Bron, bron, bron…”. brontolava i Balotoni noando drento el brodo, fasendo rebaltòni e corse a l’impazà, scontrandose co’ la zegola e ciapando scuzonà dal coercio de la pegnata ca li tegnèa stropà. “Bron, bron, bron… a ne s-ciopa el cuore a furia de bojare! Siora cuoga, par carità, la ne daga tregua ca sen zà s-ciopà!” “ ‘Na s-cianta ancora stè a fogo lento, po’ finirà ‘sto gran tormento, dal fornelo ve sotrarò e, fin a doman ve lassarò in conzièro par far la delissia d’ogni sculiero”. “Bron, bron, bron…” brontolava i Batoloni “chissà se el nostro brodeto piasarà a veci e putini o si preferirà i dadini ai nostri fasoloni che, boni, boni, boni si, ma, ‘na s-cianta dopo ca te li ga magnà, ‘sti birbanti, par de soto i se fa sentire co’ dei supioti ca te fa morire!” (Premiata al Concorso “Ulgibos” di Cavarzere)

LETÀRA A DANIELE

Adio, Daniele nuvola de bòcoli biondi, fasòlin col dente che spionava l’alba da soto la tèra isguazà. Adio, bochina de rosa. El to dire gera un desfare de note che carezava corde sonore de viòle. El to soriso on s-cioco de papavaro schizà su la fronte. Adio, Daniele. Domàn te sirà lassù, volanda col filo sbregà. Fra zielo e tèra te lassarà ‘na nuvola de bòcoli biondi e do oci aqua-marina sranà su falìve d’insogni

Le to man picinine zogarà fra le stele co’ piume de lòdole a sbusàre le nuvole. I to bianchi ditini zercarà rami de fole desperse ne l’aria. El miracolo che vinze la morte stanote g’ha perso. Adio, Daniele, frègola de carne che g’ha sfrisà l’anema del tempo, picolo coriandolo senza carnevae. Fra mile e mile ànzoli doman te spuntarà, ciaro bucaneve de zielo, a inpizàre el silenzio. (Premiata al “Poetar Padano di Carpi)

ZOGHI DE ‘NA OLTA

Na olta che salti a la corda e a scaloòn e che partie a sasseti sentà sora al meale co la Nori e la Santina finchè me fradéi zogava a ciocheta co i botùn sora i rochèi! No’ se spendea schei e se se desmentegava chi grandi gera a tola magari chi magnava… Ancuò ‘sti zoghi bei i xe desmentegà e i putini inveze de zugare i sta par ore e ore incolà al televisore par vardare inbambolà tuta la serie di cartuni animà!

ZERCAVO EL FOGOLARO

Mezodì. Rompéa l’odor de le menestre cote i tòchi sechi del campanòn de piaza. El portòn de scola de colpo se verzéa. Xolava fora i fioi come s-ciapi de oséi smarazà. Pozà a on paracaro solo mì restavo a spetàr me opà. Po’, in cana a la bici ‘ndàvino par ‘na strada longa de campagna deserta e dissestà. Lu ‘l muso duro, mi la boca sarà. A casa nissùn ne spatava. La porta gera inciavà. Le pegnate lustre al so’ posto come me mama le gheva lassà. Co’ lagreme sconte zercavo al fogolàro ma le manine verte spalancà rancurava solo frègole de zènare giazà. (1° Premio al Concorso Regionale “Bruno Tosi” di Verona)