El torneo de balon

Mi a no stago più a Rovigo da quasi quarant’ani, ma de la Tassina me ricordo ben, anca se alora stasevo in Comenda.

Do o tre robe me xe restà imprese e adesso ve le conto. Intanto da putin pensavo che la Tassina fosse l’ultima nata de la fameja dei tassi, la fiola più picola del tasso e de la tassa. Dopo, più grandeselo, avendo imparà un po’ de storia, credevo che la se ciamase cussì parchè, nel medioevo, quei ca ghea da passare da lì par ndare a Rovigo, i dovea pagare na piccola tassa: na tassina appunto. Inveze son vegnù a savere, da poco, che el gera el nome de na tenua che ga dà el nome a tutta la zona.

Da bocia, in Tassina a vegnea a pescare sui scoleti e, quando i ghe molava l’acqua marza del zuccherificio, mi e altri fioi, armà de sfiossina, a ciapavino un mucio de lussi, tenche e barboni che i vegnea a bochezare de sora da l’acqua. No so se chei scoleti i ghe xe ancora; qualche tempo fa li go zercà, ma no so sta più bon de catarli, anche parchè son capità ne la parte nova de la Tassina: nè fossi, nè scoleti, ma tanti palassi, tante bele case con vie larghe e squadrà e verde ben tegnù, e me son dito: varda ciò che quartiere de siori.

Ma vegnemo all’avvenimento sportivo che forse i se ricorda ancora quei che de ani ga passà la zinquantina.

A Rovigo gera sta organizzà un torneo de balon in notturna tra i vari quartieri. Ghe gera el quartiere S. Bortolo, el quartiere Duomo, la Comenda, S Pio X, S. Francesco, ognuno co la so squadra. La Tassina l’è passà par un pelo, parchè quei del Duomo diseva che Rovigo finiva dai Frati.

Scuminzia dunque el torneo. La Comenda, che la se gà fato prestare tre zogadori dal Mardimago e do dal Concadirame, vinze le prime partie e nel quartiere la freva balonara la se alza.

La sira, quando la squadra, partendo dal bar dedrio la cesa de la Comenda se porta al campo sportivo, un sciapo de zente ghe tien drio bacajando in coro: “ojo, petrojo, aqua minerale, par bater la Comenda ghe vole la Nazionale!… Ojo, petrojo….”

Stessa solfa al ritorno, dopo aver vinto la partia: i comendatori scalmanà, con mi bocia in mezzo, par le vie de Rovigo, a un boto de note a urlare: “ojo, petrojo, aqua minerale, par bater la Comenda ghe vole la Nazionale!”.

S. Bortolo, el Duomo, e San Pio i vien scartà. Resta la Tassina che, in un finale da ricordarse, bate da Comenda. Semo contenti lo stesso: l’importante gera batere quei smerdoni piazzaroi del Duomo che i crede de essere solo lori i cittadini.

Compagnemo fin al bar la nostra squadra, ma gavemo ancora voja de cantare…

Che la volta, par le vie de Rovigo, a un boto de note, la squadra in testa, mi bocia in mezzo, se ga sentìo bacajare: “Ojo, petrojo, saon e varechina, par bater la Comenda ghe vole la Tassina!”.