Le Poesie

EL BECARO RINALDI

Quarti de bo’ par ogni canton e meze borèe a penzolon, boriosi barbastreji stronfagnà, col timbro del dazio sul figà, i sfamava la calca de zente che no comprava da Gino Valente.

Spose in tzopèi, da via Stanào, e ssiore in capèo, da ogni cao, le butava l’ ocio ssul finestrin in mezo a la porta del giazzarin par vardare la carne tacà ai gantzi e organizzare tzene e pranzi.

Bistèche e brasòe Rinaldi pistava ssul tripiè che deboto crolava, ossi da brodo, rognoni e polmon i ssaltava fora da ssoto al bancon e iscartozzà co na carta zala, al masenà i ghe faseva ala.

Zo dal sofito, na testa de toro, co’ le rece e la boca infiochetà de aloro; no podevimo far de manco de vardare, anzi sse spetavimo de ssentirla mutelare. Batisòsoe del tzarvèo che un fiatìn s’imborezzava come la spièra de soe che ssoto al vòlto spionava.

PANTERA

El calùzene ca spandeva le stùe de piera el gera manco nero del muso de Pantera. Sse fadigava parecio a starghe da vizzin parchè el spussava da cuora e da freschin.

Cavèi ludri come na sorza impetolà, jachetina da figo de la festa de l’Unità, braghe incutzìe poncià ssui zenoci scarpe intzaltrà de tera e altri toci.

El caminava co le buganze in cancrena, ma col giornae de jeri ssoto na sèna, e quando che in ditzèmbre rivava Nadae ssora al sso albore no slusegava bae.

Cargo de anèi e de diavoi ne le man el faseva le gattorizzoe a na ciopa de pan prima de scomitziare a becolarla o a metarsea in scarsèa par matziparla.

L’ostaria de Merlo e quea del Moro le ’ndava benon come datori de lavoro, in mezo al resto de tzerta zente che insieme al vin va controcorente.

Co na cica in man, brusà nel sso lèto, el n’à ssaludà, fasendone dispeto. La sso storia la xè finìa ssul Gazetin, come quea de un eroe, vitima del destin.

LA VECIA GUZZI

Drento un tzesto la gaveva i limoni e la diseva che i gera i più boni. — I xè martzi — i fijoi ghe tzigava, e ea… pronti che la sse incazzava.

La sse tirava in fatza a la pescaria e fin a un boto no l’andava più via. A vardarla proprio ben da vitzin la pareva la miseria in capeìn.

Se qualche vilàn, par provocarla, el scomitziava a cojonarla, la deventava bechente come el cren e tzerte matine la spuava velen.

La sse strapegava sul sso baston, ma no la gaveva bisogno de compassion; sul liston co la sso lenguazza la smarazzava i colombi de la piazza.

Che la fusse na vecia insemenia… de scrivarlo proprio no me sentirìa; forse la finiva la sso stajon come la ssalata ca va in canon.

LA MISS BOROTALCO

Degna erede de la Gainazza, ma più gajarda e manco pantazza, nei ani sessanta girava par Rovigo un tòco de banda che de più no digo!

Piena de curve e de montagnoe, come la strada ca va a Porto Toe, na via de mezo tra Lollo e Bardot, sse la immaginavimo nuda ssoto al paletot.

Coreva el tempo de le magiorate da la ponta del naso fin ssoto le culate, done de buro… ma demoghe un tajo, dato che a bastoni a ssemo in sfajo.

Làvari rossi e cavèi ossigenà, onge da gata ca desfa i sofà, ssentà al Molinari la sse sbingolava lassando sbasij quei ca passava.

De punta in bianco la xè sparìa, robandone tuta la fantasia de un esemplare da rotocalco che noantri ciamavimo Miss Borotalco.

MOCOLÒN

Ssentendo sta parola te ghe associ na canapia rossa piena de snaroci e invezze el xè el nome de un cavalo ch’el vecio Geddo el tigneva in stalo.

Nobile bestia dal manteo marron el gera el sosia del sso paron, pien de tzeche e de peoci par no dire de le scarpèe nei oci.

Vardandolo spionare dal’oblò te podevi confondarlo co’ un bò da la criniera onta e sgramegnà che gavarìa volesto lavà e bruscà.

Par sparagnare no valeva la pena de darghe da magnare carate e avena che sse comprava da Sgaravati, ma sgusse de anguria par bosegati.

Sse sto animae me tormenta la memoria xè parchè el ga bu el sso momento de gloria e ae corse al troto chi lo puntava le gera pavetoe ch’el sse ciapava.

Quando che in otobre vegneva la fiera de la sso Rovigo el portava la bandiera… el xè morto de infarto, come un crestian, a Ponte de Brenta, co’ la vitoria in man.

ALVISE PEONA

Passando pal vicoeto del Canevon, da la Carmela o ssu la porta del Storion, te incontravi de ssicuro Alvise Peona: _un bisso orbesin fato persona.

Intortejà in te na gabana scura onto bisonto ch’el fasèa paura, te lo conossevi dal garofano rosso che no ghe mancava mai indosso.

Drito impalà, tuto d’un tòco, come na manàra piantà ssu un tzoco, el te vardava co na espression squasi par dirte — te ssi un cojon —.

El gaveva el teatro nel cuore e in te la gargàta da primo atore, co la sso batuta giusta e seca, come na ontriga che presto te bèca.

Sorbendosse un geato, de quei de Sigolo, el sse la rideva da la scafa al bonigolo e vardandolo caminare in trambalon, pareva che de la piazza el fusse el paron.

LA GAINAZZA

In mezo a la fumara de zenaro sse vedeva spuntare na lumazza, el gera el muso de la Gainazza, spetro de femena da ponaro.

Infratonà co’ tre chii de sbèeto, dura impetìa cofà un paracaro, vista da distante la faseva ciaro, sul ponte del sae, drio al canaeto.

De sera la girava co’ le sso strasse ssoto al portego de l’ospedae o nel canton de le ssete bae; no’ passava can che nol la vardasse.

L’andava a bevare drento al Cogheto, la sse ssentava al ssoito tavoìn, co’ na crema e un goto de vin, de qua de la vetrina la faseva efeto.

No xè che la fosse una de quèe, ma ssa te geri ben disposto e te la portavi in qualche posto, la t’in faseva vedare de bèe.