La casa de Mazuco

Quando ca jera picolo, a vivea a Castelo in ‘na casa vizin a l’arzene del Canalbianco. El jera un palazoto grande, de quei de ‘na volta, dove ca se stava tuti insieme. A ghe jera i me noni, i me genitori e i me tre fradei, i me zii con i so tre fioi e anche le do zie più zovene che ancora le studiava. ‘Na bela famejona come ca ghe jera ‘na volta in ti nostri paesi.

Senza television o zoghi eletronici come ca ghè adeso, ai puteleti, dopo aver fato le lezion de scuola, a ne ghe restava altro che trovarse in te la grande corte de la casa insieme a tanti altri ragazeti del vicinato. Quindi partìe col balon o corse in bicicleta (quei ca la gavea), zoghi a scondaia o col bindeche (lippa), o la corda, o la palla prigionieri e, ne la stagion calda, bagni e tufi ne le aque, alora ciare, del canale.

Verso sera a se rientrava in casa e, fin ca se spetava l’ora de zena, a ghe jera me zia Gianina, la più zòvena de le do sorele, che la ne vardava le lezion e la ne fasèa lèzare – visto che la studiava par deventar maestra – e, a volte, la ne contava storie del paese e de le persone ca ghe abitava. Storie vere, che le jera proprio sucesse, e che me zia la saveva contarle cussì ben ca jerimo contenti de sentirle, tanto da farghele ripetare più de na volta.

Mi a me ne ricordo una in particolare. L’è quela ca parlava de Pio Mazuchi e de so mujere, la siora Marieta che me zia la gavea conossù parchè, da ragazeta, la andava spesso a casa soa, che la jera vizin a la nostra. E po’, me zia la la contava cussì ben che la parèa ‘na fola. E, dato ca me la ricordo, provè a scoltarla anca valtri come che la fusse me zia a dirvela.

Su le do sponde del Canalbianco, dopo la curva del mulin, a spuntava fora Castelo, on paese ch’el jera ‘na galanteria par le so case signorili, par la so bela ciesa, par la so piaza col cafè grande, par la so zente importante.

Propio dirimpeto al ponte, su la riva zanca, silenziosa, come quei ca ghe vivea, a ghe jera la casa dei Mazuco, un bel palazo elegante come ca gavèa i siori de alora. Se andava dentro par on porteleto che se verzèa zigolando, se andava zo par ‘na scalinà ca finiva in t’on zèleze de piere fregne, messe in cortelo parchè no le se sbrisolese col jazo, e che le rivava fin su la porta.

Quanti fiori tuto intorno! Nel giardin davanti a la casa, rose, zinnie, leandri, garofoli, che la siora Marieta la curava come che i fusse i so putini – visto che non i gavèa fioi. Nel giardin de drio, inveze, piante selvadeghe par le ave (le api) de sior Pio.

Do creature che gà vissù ne la riservateza n’intera vita de studio, de esperienze, de rizerche, de generosità, senza mai fare el più picolo bacan.

Ela, fine, nobile de animo e de trato, ispetrice de la scola de alora, la jera stimà; tuti ghe volèa ben par ch’el so soriso dolce, par ch’el so intendere i dispiazeri dei altri, par ch’el so darse senza domandar gnente. Da la so poltrona ca jera in t’el canton del tinelo vizin al balcon che vardava el ponte, la vivèa la vita del paese: non par far ciacole, ma par rivàre al momento giusto a dare el so inteligente e generoso aiuto a chi ca ghe ne avea bisogno.

Anca lu el jera tanto bon, ma un fià rustego e riservato, più par difesa che par boria. Sempre serio, taciturno, quasi distante da i altri, cussì ca parèa ch’el volesse vivare ‘na vita par conto soo. El se sarava in t’el so studio: ‘na gran camara piena de libri spargugnà da par tuto e lì el deventava n’altro. El jera contento, disteso, el parèa parfin più zòvane.

El gavèa ‘na gran pasion par le ave (le api); el ghe n’avea tante, el volèa saver tuto de lore, par questo el stava ore e ore a vardarle, a studiarle. Lu stesso el tirava fora el miele e la zera da le so casete, co jera ora.

Soto sera, d’istà, el fasèa ‘na caminatina, da solo, par el paese, sempre vestio de scuro co un capelo de panama calcà quasi sui oci. A volte el portava la bagolina ca ghe serviva par butare in sù i sassi e le foje e lo aiutava a non vardare in facia la zente; a volte, con le man ciapà de drio de la vita e i oci squasi sarà che i se perdèa in te i so pensieri, el caminava come s’el fusse sta’ in t’un altro mondo. No ‘l saludava nissun; però, se qualcun ghe dava la bonasera, el rispondeva: “la riveriso”: un saludo anonimo che non lo portava via da le so meditazion.

Nissun gavèa el corajo de rivolgerghe la parola par strada, né de andare a catarlo in casa. Sto omo però, che el parèa tanto duro e schivo, el gà amà teneramente la so Marieta, le ave, i fiori. El gà lassà le so fadighe ai polesani e la so casa – la casa de Mazuco – ai veci del so paese.

Qua finiva la storia de Pio Mazuchi che me zia Gianina la ne contava, ‘na storia ca me gà sempre incuriosio, e, quando ca son deventà grande, a gò volesto savere cossa che le jera sta ste fadighe de sior Pio.

Le jera i libri ch’el gà scrito, specialmente “La cronaca di Castelguglielmo 1866 – 1932”, un diario scrupoloso e pien de particolari, de quasi otozento pagine, su tuto quel ca jera sucesso non solo in paese, ma anche in Polesine; tuti i avenimenti de quasi setant’ani con le notizie sul Regno d’Italia, l’emigrazion de fine otozento, le lotte partigiane con Matteotti ca vegneva a Castelo, le beghe politiche locali, le bataje contadine con “La boje” e anche tanti petegolezi su vari personagi dela zona, tanto che el Mazuchi el gà lassà scrito che ‘sto libro, ch’el gavèa consegnà all’Accademia dei Concordi de Rovigo, el vegnesse pubblicà pareci ani dopo la so morte, che l’è sta’ nel 1932. Infati l’è sta stampà solo nel 1995.

El Mazuchi el gà scrito anca el “Dizionario polesano – italiano”, publicà nel 1907. De questo mi a ghe nò na copia con la dedica fata da la siora Marieta a me zia Gianina. E po’ anca le “Memorie storiche di Castelguglielmo” (1903) e altri interesanti libreti su i proverbi, le ave, le piante e i fiori.

Par quel ca diseva me zia Gianina su la casa del Mazuchi lassà ai veci del paese, a ghè da dire che purtropo el palazo de sior Pio l’è sta’ centrà in pieno da ‘na granata proprio i ultimi giorni de guera nel 1945 e che l’è andà distruto. Però la rendita de la tera ca ghe iera atorno l’è sta’ destinà par pagare in parte le rette de’ veci bisognosi ricoverà in casa de riposo. E, sucesivamente, su ‘sto tereno, al posto de la casa, a ghe sta’ costruia la scuola media e, pochi ani fa, anca quela primaria. Se pol dire, quindi, che la zente de Castelo la gà beneficià anca del lascito del palazo, che tuti i ciamava “La Casa de Mazuco”.